Як паведамляе рэсурс , фестываль музыкі маладой Беларусі «Басовішча», які адбываўся ўжо болей за 20 гадоў, сёлета пад сур’ёзнай пагрозай адмены. Польскае міністэрства, што раней выдзяляла грошы на фэст, вырашыла адмовіць у падтрымцы яго заснавальнікам і традыцыйным арганізатарам з-за хібаў са справаздачнасцю.
Скандал з нагоды небяспекі адмены штогадовага фестывалю «Басовішча» абмяркоўваецца ў польскіх СМІ з пачатку года. Прычынай стала адмова ў падтрыманні заяўкі арганізатараў на фінансаванне 23-га фэсту. Міністэрства адміністрацыі і інфарматызацыі адмовілася выдзеліць «Беларускаму аб’яднанню студэнтаў у Польшчы» 150 000 злотых (каля 44 тыс. долараў). Як паведамляе беластоцкае выданне Gazeta.pl, прычынай міністэрства назвала нядобрасумленнае стаўленне арганізатараў да фінансавых справаздач.
У той жа час старшыня БАС Кася Кузьміч адрэагавала на гэту інфармацыю заявай, што яны не здадуцца і будуць шукаюць іншыя магчымасці для фінансавання.
Рашэнне па адмове па заяўцы БАСу ад міністэрства канчатковае. Аднак прымаючы да ўвагі праблемы заяўніка і выключную важнасць фэсту для развіцця культурнай самабытнасці беларускай меншасці ў Польшчы міністэрства вырашыла правесці асобны адкрыты конкурс сярод мясцовых арганізацый на правядзенне рок-фестывалю. БАС у сваю чаргу адзначыў, што прыме ўдзел і ў гэтым конкурсе і дзеля гэтага будзе шукаць дасведчанага партнёра, які дапаможа ім у арганізацыі.
Сваю дапамогу ў правядзенні фэсту ўжо агучыў дырэктар оперы і філармоніі Рабэрта Скалмоўскі. На мінулым тыдні ён сустрэўся з прадстаўнікамі мясцовых беларускіх таварыстваў. Гаворка ішла пра ўратаванне фэсту і магчымасці дапамогі арганізатарам: правядзенне некалькіх фестывальных імпрэз у амфітэатры і дапамогу ў лагістыцы ды бухгалтэрыі.
«Опера працягнула нам руку. Нам патрэбны дапамога і партнёры, а гэта сур’ёзная і аўтарытэтная ўстанова. Калі ёсць магчымасць уратаваць фестываль, дык чаму б ёю не скарыстацца?», — пракамэнтавала Кася Кузьміч, галоўная арганізатарка двух апошніх «Басовішчаў».
«Басовішча» — унікальны беларускі музычны фестываль, які ўжо болей за 20 год ладзяць розныя пакаленні студэнтаў беларускай нацыянальнай меншасці ў Польшчы, згуртаваных у «Беларускае аб’яднанне студэнтаў». Назва фэсту паходзіць ад абрэвіятуры арганізацыі — «БАС». Праз тое, што фестываль рабіўся студэнтамі, пакаленні якіх змяняюцца рэгулярна, музыкі і журналісты часта выказвалі заўвагі і парады да арганізацыі імпрэзы. Часам заўвагі ўлічваліся, аднак праз пэўны час недахопы паўтараліся. Тым не менш «Басовішча» застаецца адной з самых знакавых культурных падзей для беларусаў Падляшша і самым вялікім фестывалем беларускай незалежнай музыкі.