Як паведамляе Лагойскі райвыканкам:
18 красавіка ва ўсім свеце па ініцыятыве ЮНЭСКА адзначаецца Міжнародны дзень помнікаў і гістарычных мясцін. Святкаванне яго прапанавана ў 1983 годзе Асамблеяй Міжнароднага савета па пытаннях аховы помнікаў і памятных мясцін, створанай пры ЮНЕСКА.
У Беларусі ў гэты дзень ужо некалькі год запар ладзіцца «Фэст экскурсаводаў». Гэта акцыя, якая была прыдумана ў 2008 г. у коле некалькіх грамадскіх арганізацый і краязнаўчых гурткоў горада Мінска. Галоўная ідэя мерапрыемства – прыцягненне ўвагі людзей да тых гістарычных помнікаў, побач з якімі яны жывуць і каля якіх праходзяць кожны дзень.
Сярэднестатыстычны жыхар Беларусі перакананы, што ў ягоным рэгіёне няма нічога цікавага. Нясумна ў Нясвіжы, цікава ў Польшчы, захапляльна ў Парыжы, а вось у ягонай вёсцы, мястэчку, мікрараёне – нецікава. Вось такія меркаванні і падштурхнулі арганізатараў да выбару фармата «Фэсту» – правядзенне шматлікіх бясплатных экскурсій у розных рэгіёнах Беларусі і, што важна, для саміх жыхароў гэтых рэгіёнаў.
«Фэст экскурсаводаў»-2012 пройдзе 21-22 красавіка. Закранае ён і нашу Лагойшчыну.
22 красавіка пройдуць экскурсіі: «У старажытным гарадку над Гайнаю…» (г. Лагойск) і «Лагойскімі дарогамі Напалеона» (Камена–Плешчаніцы–Акцябр).
Наведаць іх можа бясплатна любы жадаючы.
Пачынацца экскурсіі будуць а 10-й гадзіне, месца збору – плошчы каля Лагойскага раённага выканаўчага камітэта ў Лагойску і Плешчаніцах.
Арганізатары «Фэста экскурсаводаў»:
ГА «Беларускі камітэт ІКАМОС»;
ГА «Беларуская асацыацыя экскурсаводаў і гідаў-перакладчыкаў»;
Краязнаўчы клуб «Камяніца» (МДПДіМ)