Як паведамляе газета "Нясвiжскiя навiны":
На мінулым тыдні ў Нясвіжы, у зале замка Радзівілаў, адбыўся сольны канцэрт сусветна вядомага піяніста Барыса Беразоўскага.
Ён праходзіў у рамках ІІ Міжнароднага фестывалю "Уладзімір Співакоў запрашае". Гэты фестываль працягвае адразу некалькі добрых традыцый, што складаліся ў беларускай і сусветнай культуры на працягу стагоддзяў. Ён ахоплівае вялікую геаграфічную прастору і розныя слаі насельніцтва - ад прафесійных знаўцаў музыкі да шырокага кола аматараў не толькі ў сталіцы, але і ў рэгіёнах. Пацверджаннем імкнення арганізатараў фестывалю данесці высокае мастацтва да розных куткоў нашай Радзімы і стала выступленне Барыса Беразоўскага ў Нясвіжы - культурнай сталіцы Беларусі 2012 года. Яго канцэрт даў магчымасць узгадаць традыцыі парыжскіх салонных канцэртаў, дзе гралі Феранц Ліст, Фрэдэрык Шапэн і наш Напалеон Орда.
Піяніст адкрыў канцэрт творам Брамса "Варыяцыі на тэму "Капрыса" Паганіні", з першых гукаў якога зала затаіла дыханне. Следам пайшлі не менш уражваючыя тры венгерскія танцы Брамса, якія чароўнай віхурай гукаў нібы перанеслі слухачоў у зусім іншы, фантастычны свет.
Далей гучалі не такія папулярныя творы, намнога менш звыклыя для вуха аматараў, але кожны з іх, аздоблены цікавымі, змястоўнымі каментарыямі самога піяніста, стаў не проста шэдэўрам, а яшчэ і арыгінальным творам, да якога дадалося ўласнае прачытанне выканаўцы.
Завяршыў славуты музыкант выступленне творамі Шапэна - двума вальсамі, без якіх, згадзіцеся, нельга ўявіць сабе канцэрт фартэ-піяннай музыкі.
Лішнім будзе казаць, у якім захапленні публіка вітала артыста па заканчэнні канцэрта. Стоячы, авацыямі, з букетамі цудоўных руж. Такіх жа прыгожых, як і музыка, што яшчэ, здаецца, лунала ў паветры залы.
Канцэрт скончыўся, але ў памяці нясвіжскіх аматараў музыкі ён застаўся назаўсёды, як яшчэ адна яскравая старонка, упісаная ў гісторыю не толькі Нясвіжа, але і ўсёй нашай культуры.