У «Ракеце» хутка з'віцца новая кіназала

10.05.2012 - Новости

У «Ракеце» хутка з'віцца новая кіназала

Аднойчы пралетарскі раён ператворыцца ў тэрыторыю арт-сквотаў і расквітнее культурніцкімі ўстановамі. А пакуль рухавіком зменаў мае зрабіцца кіназала ў «Ракеце»

На другі паверх кінатэатра пераехаў праект Cinemascope – той, што круціў для нас разумнае кіно ў «Цэнтр-відэа» і па серадах робіць гэта ў «Перамозе». 34mag ацаніў рамонт і пагутарыў з галоўнымі кінарамантыкамі Менска.

«Фатэляў пакуль няма, – папярэджвае Оля Надольская, палова праекту Cinemascope. На днях прывязуць з Горадні». Другая палова праекта, Гера Глік, у гэты час расцягвае па кутах ужо прывезеныя фатэлі-мяшкі. Хутка невялікі пакой блакітнага колеру ператворыцца ў кіназалу, дзе можна будзе пабачыць ранняга Кубрыка на Blu-ray, Хічкока ў HD або шведскі sci-fi 1960-х на стужцы 8 мм. Адзін Рамэра ведае, колькі колаў бюракратычнага пекла давялося прайсці арганізатарам.

Праект Cinemascope існуе з 2009 года і ёсць лагічнай рэінкарнацыяй кінаклубаў Менска 1990-х. Гера Глік пачаў займацца кінадзейнасцю яшчэ ў той рамантычны час, калі з Масквы напаўлегальна прывозілі фільмы Антаніёні на касетах. З цягам часу далучылася Оля – і нарадзіўся Cinemascope. Яны ладзяць паказы ў кінатэатры «Перамога» па серадах і працяглы час рабілі гэта ў «Цэнтр-відэа». Аднак сёлета ў лістападзе кіназалу ў «Сталіцы» зачынілі з-за нерэнтабельнасці і стварылі на яго месцы звышрэнтабельны зал гульнявых аўтаматаў. Настаў час змяніць месца дыслакацыі.

Менскі кінавідэапракат прапанаваў некалькі пляцовак, у тым ліку самы саўковы з існых кінатэатраў – «Ракету». «Калі мы прыйшлі сюды і пабачылі залу – штучныя кветкі, гномікаў і зайчыкаў на сцэне – быў шок», – успамінае Гера. Амаль выпадкова трапілі на другі паверх – ён прызначаўся для вечарын «Каму за 60». Спачатку думалі проста замяніць сцёрты бабульчынымі абцасамі паркет – аднак мінімальнага рамонту аказалася недастаткова.

Праект залы распрацавала нейкая мадам з дзяржарганізацыі, «Менсккінавідэапракат» выдаткаваў грошы на рамонтныя працы. Экран, акустыка і гукаўзмацняльнікі прыехалі з «Цэнтра-відэа». Астатняе – апаратуру, мэблю, праектар – Гера і Оля набывалі за ўласныя грошы. «На чорны дзень не засталося нічога», – усміхаецца Оля. Пры тым, што з погляду грошай Cinemascope – сайд-праект для стваральнікаў. Гера працуе ў «Менсккінавідэапракаце», ён адказны за ўсю тыпаграфію, Оля – аналітыкам на расійскім кінасайце. Аднак да пытанняў акупнасці яны ставяцца спакойна.

…Аднойчы пралетарскі раён ператворыцца ў тэрыторыю арт-сквотаў і расквітнее культурніцкімі ўстановамі. А пакуль рухавіком зменаў мае зрабіцца кіназала ў «Ракеце». З ідэалістычных мараў – зрабіць wi-fi, паставіць аўтаматы з ежай ды напоямі, сабраць кінабібліятэку, ладзіць абмеркаванні і дыскусійныя клубы. У арганізатараў шмат відэа-арту – аднак для яго трэба адмысловая арганізацыя прасторы. Асаблівасці ініцыятыўнай дзейнасці ў Беларусі пакуль прытарможваюць гэтыя працэсы. Аднак прагрэс непазбежны – каб гэта зразумець, варта наведаць мясцовую прыбіральню, якая доўгі час была апошнім канцэнтраваным подыхам саўка. Разруха, хаця б у прыбіральнях, непазбежна знікае.

Фішачка 1.  Субцітры

Фільмы будуць дэманстравацца на мове арыгінала з рускімі субцітрамі – гэта прынцыповая пазіцыя. Магчымыя рэдкія выключэнні – калі рэліз расійскі. Дарэчы, субцітры Оля кожны раз перакладае адмыслова – у стандартных шмат памылак, ад арфаграфічных да фактычных.

 

Фішачка 2.  Фарматы

HD-DVD, Blu-ray. Плануюць дэманстраваць фільмы са стужак 8 і 16 мм – наўрад ці вы адшукаеце такое на пару соцень кіламетраў вакол.

 

Фішачка 3.  Рэпертуар

Адзіныя, хто не выкарыстоўвае соты раз дзяржаўных запаснікаў і сам набывае пракатныя копіі стужак. Рэпертуар складаюць, зыходзячы з уласнага густу і таго, што здольныя набыць ва ўладальнікаў правоў. Першым часам будзе мікс з раней паказанага – Вэндэрс, Саўра, Хічкок ды інш. 19 мая з Масквы прыедзе з лекцыяй кіназнаўца Віктар Зацэпін, які напісаў кнігу пра Стэнлі Кубрыка. Гэтым распачнецца рэтраспектыва ранніх фільмаў майстра ў HD. Будзе шмат французскага кіно, а ў наступным годзе плануецца паказ стужак групоўкі «Занзібар», прымеркаваны да «чырвонага мая» 1968-га.
  

 

  

Кіназала ў кінатэатры
«Ракета»

Працоўны завулак, 3 (ст. м. «Пралетарская»)

Колькасць месцаў: 30–40
Кошт квіткоў: 10 000 – 15 000
Працуе: серада – нядзеля. Выходныя – панядзелак, аўторак.
Сеансы: 19:00, 21:00

  Сачыце за падзеямі на сайце праекта Cinemascope

 

 


Рубрики: В Фокусе Инфраструктура

Страны: Беларусь


Комментарии отсутствуют

Новый комментарий

Имя:
:
Для редактирования комментария осталось 10 минут

Новости по теме:

Турнавигатор

Вся история белорусского турбизнеса в газете «Туризм и отдых»   |   Активный отдых   |   Калькулятор отдыха   |   Горные лыжи   |   Агротуризм   |   Путеводитель   |   Экзотические направления   |   Путешествия по Беларуси   |   Самые оригинальные бани на белорусских агроусадьбах