Шматлюддзе панавала ў  мінулую суботу на беразе возера Мястра. Уся пляжная тэрыторыя была ператворана ў гэты дзень у своеасаблівую сцэнічна-гульневую пляцоўку, а ўздоўж дарогі размясціліся сама­дзейныя майстры са сваім таварам – з Пастаўшчыны, Шаркаўшчыны, Ла­гойшчыны, Крывічоў, а таксама  гандлёвыя палаткі (з продажам страў з рыбы і дэгустацыяй квасу), паведамляе «Нарачанская зара».

Асноўная дзея  пачалася а 16-й гадзіне. На імправізаваныя падмосткі выхо­дзіць Яе Вялікасць Царыца Ва­ды з памочніцамі-русалкамі. Яны адкрываюць свята і абвяшчаюць яго праграму. Затым для падвядзення  вынікаў саперніцтва аматараў рыбнай лоўлі на сцэну запрашаецца начальнік аддзела па фіз­культуры, спорту і турызму райвыканкама А. І. Крыштафовіч.

– Спаборніцтвы праходзілі на возеры Мястра з 7 гадзін раніцы да 2 гадзін дня, – адзначае Антон Іосіфавіч. – Праўда, рыба сёння аказалася больш актыўнай, чым рыбакі. Тым не менш пераможцы выяўлены. У намінацыі «самы буйны экзэмпляр» вызначыўся Яўген Садоўнікаў, якому на кручок патрапіў шчупак вагой паўтара кілаграма. Антон  Каласоўскі налавіў больш за ўсіх – 9 кілаграмаў 400 грамаў, а па колькасці  першым стаў Валянцін Гушча – 320 штук.

У гэты час  непадалёк на пясчанай пляцоўцы якраз завяршыўся турнір па пляжным валейболе.

– У ім прынялі ўдзел 13 каманд, – расказвае суддзя спаборніцтваў М. У. Чаркасаў. – Спаборніцтвы, нягледзячы на спякоту, прайшлі ў захапляючай барацьбе, ніхто не хацеў саступаць. У старэйшай узроставай групе перамагла каманда Мядзельскай сярэдняй школы № 1, у сярэдняй – валейбольная дружына «ФАК-2», а сярод юнакоў – каманда «Нептун-1».

Затым на цэнтральнай  пляцоўцы  пачалася канцэртная праграма з удзелам аматарскіх мастацкіх калектываў з Віцебшчыны, Маладзечанскага і Вілейскага раёнаў, Ві­лейкі. Забягаючы наперад, скажу, што завяршылася яна позна ўвечары выступленнем артысткі беларускай эстрады Іскуі Абалян.

Трэба зазначыць, што арганізатары  пастараліся, каб на гэтым свяце можна было добра правесці вольны час не толькі дарослым, але і дзецям. Шмат чаго ці­кавага бы­ло ар­ганіза­вана для іх на пляцоўцы «Гульневы падворак», дзе ўладарыла цётка Вадзяніца. Дзе­ці з задавальненнем  удзельнічалі ў разнастайных конкурсах, ляпілі фігуры з пяску, забаўляліся на надзіманых атракцыёнах. А вось артысты з Жодзіна паказалі для падлеткаў майстэрства брэйк-данса.

Асаблівай увагай і ў дарослых, і ў дзяцей карыстаўся «Рыцарскі лагер». Былі прадэманстраваны рыцарскія
паядынкі, паказаны старажтныя гульні.

А яшчэ мож­на было самому стрэліць у мішэнь з лука альбо кінуць баявую сякеру. Сам паспрабаваў, нялёгкай аказалася гэта справа!

 

Яшчэ шмат чаго цікавага сустрэў. Можна было, напрыклад,  выпрабаваць на манекене моц удару, даведацца пра свой біялагічны ўзрост. Праўда, апошняя цуда-машына ў рэшце рэшт зламалася – пэўна, не вытрымала напору бадзёрых мядзельцаў і гасцей.

Праходзілі разнастайныя спаборніцтвы на вадзе, па люстраной паверхні Мястра снавалі  байдаркі, яхты пад белым ветразем. І літаральна ўсіх захапіла водная феерыя, падрыхтаваная раённым аддзелам МНС. У дадатак побач запрацавала спецыяльная ўстаноўка па вырабу пены. Вось тут дзятва поўнасцю адвяла душу!

У цэлым, думаю, мера­прыемства атрымалася. Па дарозе да­до­му давялося паразмаўляць з масквіча­мі, якія завіталі ў Нарачан­скі край на адпачынак. Свята ім спадабалася, як і невялікі наш утульны  гарадок!