Праграма «Спадчына Крэсаў» (Dziedzictwo Kresów) рэалізуецца ўжо трэці раз. У 2008 годзе японскія даследчыкі спазнавалі феномен шматкультурнасці польска-украінскага памежжа, а ў 2010-м – падарожнічалі па мяжы Польшчы і Літвы.

Гэтым разам у навуковай паездцы бярэ ўдзел 21 прадстаўнік EU Institute in Japan Tokyo (які сам з’яўляецца кансорцыумам 4 японскіх ВНУ). Цягам 10 дзён яны плануюць знаёміцца з месцамі Заходняй Беларусі, што звязаны з творчасцю польскіх пісьменнікаў і артыстаў і гісторыяй Рэчы Паспалітай. Такім чынам, Гродна і ваколіцы ўдзельнікі праекта будуць разглядаць у кантэксце творчасці Элізы Ажэшкі, перадусім яе рамана «Над Нёманам». Іншыя арыенціры – жыццё і творчасць Адама Міцкевіча ці гісторыя буйных магнацкіх родаў Сапегаў і Радзівілаў (Нясвіж). Мінск у сваю чаргу цікавы гасцям як Горад Сонца – архітэктурны помнік манументальнай утопіі.

Сёлетні навуковы візіт – апошні ў пяцігадовай праграме «Спадчына Крэсаў». Праграма ўжо дазволіла японскім навукоўцам-адмыслоўцам у пытаннях гісторыі і культуры Сярэдняй і Усходняй Еўропы пазнаёміцца са сваімі калегамі з Польшчы, Украіны і Літвы, а ў гэтым годзе – з Беларусі.

Лёша Шота