«Сапраўды, самы незвычайны магільны склеп у Беларусі пабудаваны на каталіцкіх могілках у горадзе Узде. Інфармацыю пра гэта мы знайшлі ў кнізе Дзмітрыя Корсака «Минщина: легенды, события, люди». Гэты дзесяцімятровы фамільны склеп быў пабудаваны ў 1800 годзе прадстаўнікамі старажытнага беларускага роду Завішаў, паведамляе «Слава працы».

Што сабой уяўляла такое грандыёзнае збудаванне? У пірамідзе было два памяшканні. Знізу размяшчаўся склеп — захаванне праводзілася ў трунах у нішах сцен, якіх налічвалася тры рады. Ля адной са сцен склепа быў устаноўлены невялікі алтар, над якім у нішы стаяла евангельская скульптура.

Але самая цікавая частка пабудовы — невялікі патаемны пакой, размешчаны амаль на самай вяршыні піраміды на вышыні 8 метраў. Некаторыя гісторыкі мяркуюць, што там праводзіліся сакрэтныя богаслужэнні. Магчыма, што гэта было месца збору членаў таварыства масонаў.

Сёння выгляд гэтай піраміды даволі сумны. Радавы склеп поўнасцю разрабаваны, нішы ў сцяне, дзе захоўваліся астанкі людзей, разбураны. Да таго ж, нехта пусціў пагалоску, што нібыта ў скляпенні захоўваецца скарб. І са сцен унікальнага збудавання пачалі выкалупваць камяні. Скарб, вядома ж, не знайшлі, а ў сценах піраміды ўсё больш дзірак.