29 чэрвеня 2013 года Студэнцкае этнаграфічнае таварыства сумесна з Магілёўскім гарадскім выканаўчым камітэтам і грамадскай культурніцкай кампаніяй «Будзьма беларусамі!» ладзіць Свята беларускай традыцыйнай культуры «Зялёныя святкі».
Мерапрыемства адбудзецца ў рамках Дня горада і святочнай праграмы «Магілёў – культурная сталіца СНД». Месца правядзення – Магілёў, этнаграфічны комплекс народных промыслаў у Зялёным Гаі (мікрараён «Спадарожнік»), паведамляе
«Зялёныя святкі» – характэрная для Магілёўшчыны назва траецкіх свят, якая адлюстроўвае ўласцівае для гэтага перыяду ўшанаванне зеляніны, дрэў, кветак, што знаходзяцца ў сваім росквіце. Менавіта яны будуць прыродным атачэннем свята, вызначаючы яго вобразнасць і змест.
Для аздаблення тэрыторыі фэста плануецца выкарыстанне аб’ектаў лэнд-арт. На святочных пляцоўках можна будзе паўдзельнічаць у траецкім абрадзе завівання бярозак і кумлення, які зладзяць носьбіты традыцыі з Бялыніцкага і Чавускага раёнаў, прыняць удзел у традыцыйных гульнях і танцах, паслухаць абрадавыя і лірычныя спевы ў выкананні фальклорных гуртоў, паўдзельнічаць у майстар-класах па традыцыйных рамёствах і павучыцца вырабу страў народнай кухні.
Акрамя гэтага, на свяце будзе працаваць кірмаш рамёстваў. У канцэртнай праграме выступаюць гурты Горынь, Dainava, Guda, Кудмень, Рада і інш. Завершаць свята выступы гуртоў Landers і Vuraj.
Магілеўцаў запрашаюць на «Зялёныя святкі»
ПРАГРАМА СВЯТА ТРАДЫЦЫЙНАЙ КУЛЬТУРЫ «ЗЯЛЁНЫЯ СВЯТКІ»
12.00 – 13.00 Можна наведаць кірмаш рамёстваў,
сплесці сабе траецкія вянкі. Нашыя дзяўчаты
заплятуць усім жадаючым прыгожыя косы.
Дадатковыя радасці для дзяцей і дарослых –
арэлі і хадулі.
13.00 – 14.00 Траецкі абрад, у якім могуць
прыняць удзел не толькі аўтэнтычныя гурты
(«Журавінкі» з в. Цяхцін Бялыніцкага раёна
і «Незабудкі» з в. Галавенчыцы Чавускага
раёна), але і ўсе жадаючыя .
14.00 – 15.00 Канцэртная праграма. Траецкія,
русальныя, купальскія спевы ў выкананні
гуртоў Сухадроўка (Віцебск), Глейна
(Гарадок), Ула (Мінск), Горынь (Мінск), Dainava
(Мінск), Guda (Мінск). З гэтага ж часу
пачынаюцца майстар-класы па рамёствах
(шапавальства, бандарства, разьбярства), а
таксама праца гульнёвай пляцоўкі для
дзяцей і бацькоў (Сяргей Выскварка і гурт
«Верабейкі»). Для маладых матуль і
маленькіх дзетак – майстар-клас па
народных забаўлянках.
15.00 – 16.00 Працяг майстар-класаў па рамёствах
(кавальства, ганчарства, лепка з гліны) і
працы дзіцячай пляцоўкі (этнапедагог
Ларыса Рыжкова і дзіцячы гурт
«Калыханка»). На танцавальнай пляцоўцы
пачынаецца майстар-клас па танцах (гурт
«Журавінкі» з в. Цяхцін Бялыніцкага
раёна).
16.00 – 17.00 Працяг майстар-класаў па рамёствах
(жаночае рукадзелле, выраб традыцыйнай
лялькі), гульнях і танцах. Майстар-клас па
народнай кухні, прысвечаны прыгатаванню
традыцыйных страў: бацвіння/заціркі,
бліноў з верашчакай, калдуноў, кнышоў з
тварагом.
17.00 – 18.00 Майстар-класы па выцінанцы,
пляценні з лазы і саломы. Танцавальны
майстар-клас ад музычнага гурта «На Таку» і
танцавальнага клуба «Сіта». У адным з
будынкаў этнахутара пройдзе паказ
этнаграфічных дакументальных фільмаў з
цыкла «Радавод» (аўтар – Рэгіна Гамзовіч).
18.00 – 20.00 Вячэрні канцэрт. Традыцыйная
інструментальная музыка і лірычныя спевы.
Выступаюць гурты «Варган», «Старое Сяло», «Рада»,
Васіль Грынь і Юлія Літвінава, «Кудмень»,
Раман Яраш і Юлія Літвінава, «Млын Сонца».
Завершаць свята выступы гуртоў «Landers» і «Vuraj».