<p>Інтэрактыўная экспазіцыя павінна з'явіцца ў музеі-запаведніку</p>

Інтэрактыўная экспазіцыя павінна з'явіцца ў музеі-запаведніку, паведамляе «Звязда».

Пра гэта паведаміў дырэктар Нацыянальнага гісторыка-культурнага музея-запаведніка «Нясвіж» Сяргей Клімаў у дзень адкрыцця вечароў Вялікага тэатра, што прайшлі ў выхадныя ў палацава-замкавым комплексе. Прынамсі, прыватная кампанія з Бельгіі прапаноўвае зрабіць «пад ключ» экспазіцыю пад назвай «Легенды Нясвіжа: 12 апосталаў» з новымі інтэрактыўнымі формамі.

— Існуюць кампаніі, якія робяць экспазіцыі «пад ключ». Нам удалося выйсці на кампанію, якая займаецца шклом з 1826 года, прыкладна 30 працэнтаў іх прадукцыі — музейныя вітрыны і абсталяванне (асвятленне, сігналізацыя, супрацьпажарныя меры), — патлумачыў Сяргей Клімаў. — Яны ўжо паставілі свае вітрыны ў 1200 музеяў свету, сярод якіх «Метрапалітэн», «Луўр», «Эрмітаж». Нас зацікавіла тое, што яны атрымліваюць ідэю і пачынаюць з ёй працаваць, каб ажыццявіць пры дапамозе сучасных сродкаў. Безумоўна, канцэпцыю і тэхнічнае заданне пішам мы. Яны прапаноўваюць варыянт, як гэта прадставіць гледачу. Зараз мы ў стадыі перагавораў па гэтым праекце. Гэта кампанія найбольш значная з усіх кандыдатаў. Але, тым не менш, мы абвесцім тэндар,  каб выбраць лепшых.

У бліжэйшы час у Нясвіжскім палацава-замкавым комплексе павінны з'явіцца 3 новыя экспазіцыі. Ужо ажыццявілі рэканструкцыю калекцыі ў Ратушы — дзеля гэтага набылі калекцыю бытавых прадметаў у прыватнага калекцыянера. Паводле слоў дырэктара, музей не стаіць на месцы, развіваецца, зарабляе сам і атрымлівае фінансаванне з дзяржаўных крыніц:

— Былі размовы пра тое, каб мы захавалі 50 працэнтаў фінансавання дзяржавай і яшчэ 50 працэнтаў зараблялі самі, як некаторыя музеі за мяжой. Зараз фактычна так і атрымліваецца. У нас добры заробак. Але да тых грошай, якія выдаткоўвае дзяржава, мы яшчэ столькі ж укладваем у развіццё музея самі. Купляем абсталяванне — напрыклад, музейныя вітрыны. Фактычна мы выйшлі на 70 працэнтаў акупляльнасці — гэта ў сусветных маштабах на ўзроўні «Луўра», «Эрмітажа». Пакуль нам выдаткоўваюць фінансаванне з тым, каб захаваць калектыў і даць магчымасць музею развівацца. У нас вялікі паток турыстаў (больш за 10 тысяч наведвальнікаў), хоць мы і думалі, што гэта будзе толькі напачатку пасля адкрыцця. Але ажыятаж захоўваецца, увесь час у нас экскурсійныя групы, асабліва шмат іх у выхадныя дні. На жаль, людзі не хочуць слухаць нашых парад, каб больш прыязджалі сярод тыдня. Але ж і ў будныя дні ў нас ёсць турысты.

Цяпер у музеі «Нясвіж» акрамя экскурсій праходзіць шмат розных мерапрыемстваў. Кожную суботу і нядзелю ў палацы Радзівілаў гучыць жывая музыка — дапамагаюць партнёры з ансамбля «Кантабіле». Іх можна паслухаць у капліцы і сталовай зале, і гэта ўключана ў кошт квітка. Дарэчы, капліцу не так даўно асвяцілі, і цяпер у ёй могуць праходзіць набажэнствы. І калі хто плануе шлюбную цырымонію ў тэатральнай зале палаца, то могуць дамовіцца і пра вянчанне. Але пакуль такіх замоў яшчэ не было.

Ларыса ЦІМОШЫК