Традыцыйна напярэдадні фестывалю «Камяніца» арганізатары ладзяць прэс-канферэнцыю ў аднайменнай рэстарацыі, на якой разважаюць пра развіццё фольк-музыкі і папулярызацыю беларускай культуры, паведамляе
Гэтым разам для гэтага склаўся асаблівы момант — юбілейны фэст мае самы зорны склад выступоўцаў за ўсе пяць год.
«Запрашаем жыхароў перш за ўсё Малінаўкі і Паўднёвага Захаду. Ды вам ісці пешшу 50 хвілін, апранулі сарочку ды схадзілі на халяву!» — заахвочвае вядоўца фэста і лідар гурта «Палац» Алег Хаменка.
Уваход на «Камяніцу» у нацыянальных строях селёта, як і раней, бясплатны.
Разынка гэтага году — «Сяброўская вячэра», што адбудзецца ў першы дзень, гэткая preparty для ўдзельнікаў «Камяніцы» за ўсе пяць гадоў яе існавання, а таксама для ўсіх, каму дастануцца запрашальнікі. У першы дзень госці будуць слухаць Ірэну Катвіцкую, гурты «Палац», «Аляксандра і Канстанцін», Shuma ды глядзець фільм «Гісторыя беларускай страўні».
7 верасня — вялікі фестывальны дзень, у які выступяць гурты «Палац», «Стары Ольса», Guda, украінскія «ДахаБраха» і «Фолькнери», польскі Orkiestra Sw.Mikolaja і рускі гурт беларускага паходжання Hvarna. Побач з галоўнай будзе працаваць дзіцячая сцэна, дзе пяць юных калектываў праспяваюць у перапынках паміж выступоўцамі на галоўнай сцэне. Адзін з іх дзіцячы калектыў «Рада» пад кіраўніцтвам Ірэны Катвіцкай рыхтуе неспадзяванку для гасцей — супольны выступ з гуртом «Палац».
Усе грошы ад продажу квіткоў традыцыйна ідуць на рахунак Музея народнай архітэктуры і побыту. Сам фэст ладзіцца сёлета ізноў дзякуючы фінансавай падтрымцы банка БелВЭБ.
Дзякуючы «Камяніцы» за пяць гадоў яе правядзення быў адрамантаваны, па словаў дырэктаркі музея Святланы Лакотка, ужо 21 помнік архітэктуры. Але Музей пакуль створаны толькі на 25% ад канчатковай задумы, таму арганізатары фэста настойліва рэкамендуюць менчукам пагрузіцца першымі восеньскімі выходнымі ў атмасферу 19 стагоддзя.
Фота: Юля Сакалоўская