<p>Пасля завяршэння прац, над гэтым важным аб’ектам, працэс аднаўлення ўнутранага ўбранства Гродзенскай катэдры не завяршаецца. Плануецца аднаўленне 8 наступных алтароў, сярод якіх у першую чаргу маецца быць адрэстаўраваны алтар св. Тройцы</p>

Год таму распачалася рэстаўрацыя адного з самых найстарэйшых алтароў у Гродзенскім катэдральным касцёле імя св. Францішка Ксаверыяі ўжо 29 верасня адбудзецца яго ўрачыстае адкрыццё і асвячэнне. Пра тое, як адбывалася аднаўленне і якія планы далейшай рэстаўрацыі чакаюць галоўны каталіцкі храм Гродзеншчыны, нам распавёў кс. Ян Кучынскі, пробашч Гродзенскай катэдры, паведамляе Grodnensis.by.

“Роўна год таму мы распачалі працу па аднаўленню гісторыка-культурнай і рэлігійнай матэрыяльнай каштоўнасці Гродзеншчыны. Першае, што нас вельмі ўразіла, калі толькі мы распачалі рэстаўрацыю, дык гэта тое, што алтар якімсці цудам яшчэ трымаўся".

Сама рэстаўрацыя, - паводле словаў душпастара, - праходзіла некалькімі этапамі: на першым этапе мы правялі аналіз стану каштоўнасці і план далейшых рэстаўратарскіх прац. Наступны этап патрабаваў прапіткі драўляных элементаў алтара спецыяльнымі, дзеля гэтага прызначанымі рэчывамі, супраць далейшага знішчэння (прафілактыка), а таксама ўзмацнення яго канструкцый. Трэці этап прадугледжваў рэстаўрацыю двух абразоў: Св. Міхала Арханёла і абраз на якім прадстаўлены святыя Клеменс, Францішак і Антоній. Апошнім этапам было фарбаванне і пазалота алтара.

Галоўны катэдральны душпастар таксама успомніў пра цікавую знаходку – тры акруглыя кулі магчыма з часоў вайны 1812 года.

Пасля завяршэння прац, над гэтым важным аб’ектам, працэс аднаўлення ўнутранага ўбранства Гродзенскай катэдры не завяршаецца. Плануецца аднаўленне 8 наступных алтароў, сярод якіх у першую чаргу маецца быць адрэстаўраваны алтар св. Тройцы (працы магчыма распачнуцца ў наступным годзе).

Паводле кс. Яна Кучынскага рэстаўрацыя была праведзеная дзякуючы ахвяраванням вернікаў г. Гродна і працы шасці рэстаўратараў з Мінска, да якіх ён кіруе выразы сваёй ўдзячнасці: “Дзякую ахвярадаўцам і ўсім людзям добрай волі за дапамогу пры аднаўленні самага старога алтара ў нашай святыні і запэўніваем памятаць пра Вас у нашай малітве праз заступніцтва св. Міхала Арханёла. Няхай Бог аддзячыць Вам за Вашыя добрыя і адчыненыя сэрцы!”

Алтар св. Міхаіла Арханёла, які месціцца ў левай наве Фарнага касцёла, з'яўляецца старэйшым нават за сам касцёл. Паводле гістарычных крыніц, алтар датуецца 1664 годам. Ён быў збудаваны ў драўляным касцёле св. Апосталаў Пятра і Паўла, а пазней быў перанесены ў касцёл св. Францішка Ксаверыя (катэдру). Паводле гістарычных даведак, у Фарным касцёле гэты алтар служыў, як алтар Маці Божай Кангрэгацкай. Ёсць звесткі, што служыў і галоўным алтаром. Пасля яго перанеслі ў капліцу св. Міхаіла Арханёла ў левай наве. Алтар цікавы тым, што мае зусім іншы выгляд, чым усе астатнія алтары гэтага храма. Таксама ён цікавы сваёй накладной разьбой, якая больш нідзе не сустракаецца. Напрыклад, на астатніх алтарах катэдры разьба больш-менш падобная. У той час як на гэтым алтары яна інакшая.

Матэрыял падрыхтаваў кс. Юрый Жэгары