Новы касцёл у вёсцы Беліца пабудавалі замест разбуранага 40 гадоў таму старога храма.

Каталіцкі прыход у Беліцы існуе з сярэдзіны ХVІ стагоддзя. Гэта час росквіту вёскі. А ў летапісах ХVІІ стагоддзя Беліца ўжо ўзгадваецца як невялікі гарадок з шасцю вуліцамі і насельніцтвам у дзве тысячы чалавек.

Стары каталіцкі храм знаходзіўся ў цэнтры вёскі, але ў часы Савецкага Саюза яго разбурылі. Дарэчы, у 1943 годзе немцы растралялі тут мясцовага ксёндза Стэфана Дабравольскага. На адкрыцці новага касцёла вернікі маліліся за ягоную душу.

У 1997 годзе было распачата будаўніцтва новага касёла. Спачатку абралі праект, затым сталі збіраць грошы. Храм ўзвялі на ахвяраванні вернікаў. Будаўніцтва касцёла пачынаў  Юльян Стоцкі, які нарадзіўся ў гэтых мясцінах. Храм ўзвялі побач з ягоным домам. Зараз тут ніхто не жыве, але ксёндз у бліжэйшы час збіраецца арганізаваць тут музей сям'і.

Дарэчы, у Гродзенскай вобласці зараз больш за 180 каталіцкіх парафій. Працягваецца будаўніцтва яшчэ некалькіх новых касцёлаў. Восенню новы храм асвяцяць ў Гродне.