Вандроўка па мясцінах Максіма Багдановіча. Да 120-годдзя з дня нараджэння паэта

10.12.2011 - Новости

Вандроўка па мясцінах Максіма Багдановіча. Да 120-годдзя з дня нараджэння паэта

За кароткія 25 гадоў жыцця класік беларускай літаратуры паспеў не толькі пакінуць багатую творчую спадчыну, стаць адным са стваральнікаў літаратурнай беларускай мовы, праславіцца далёка за межамі сваёй радзімы, але пажыць і ў Беларусі, і ў Расіі і ва Украіне. І кожны з гарадоў, дзе праходзіла жыццё паэта, захоўвае добрую памяць аб ім

За кароткія 25 гадоў жыцця класік беларускай літаратуры паспеў не толькі пакінуць багатую творчую спадчыну, стаць адным са стваральнікаў літаратурнай беларускай мовы, праславіцца далёка за межамі сваёй радзімы, але пажыць і ў Беларусі, і ў Расіі і ва Украіне. І кожны з гарадоў, дзе праходзіла жыццё паэта, захоўвае добрую памяць аб ім. 

Мінск

9 снежня 1891 года ў цяперашняй сталіцы Беларусі нарадзіўся Максім Багдановіч. Але ўжо праз некаторы час сям’я будучага паэта пераехала ў Гродна.

Зноў вярнуцца ў Мінск атрымалася ў Багдановіча толькі ў кастрычніку 1916 года. Ён працаваў тут у губернскім харчовым камітэце – дапамагаў ахвярам вайны. Гэта была цяжкая і самаадданая праца, якая падарвала і без таго слабое здароўе паэта. Тым не менш Багдановіч не пераставаў пісаць. Каб палепшыць яго фізічны стан, сябры сабралі неабходныя грошы і адправілі паэта лячыцца ў Крым, адкуль ён ужо не вярнуўся.

Хаця Максім Багдановіч пражыў у Мінску зусім нядоўга, многае ў горадзе напамінае аб ім. Былая вуліца Александраўская, дзе раней жыла сям’я Багдановічаў, была пераназваная ў гонар паэта. Перад Тэатрам оперы і балета на плошчы Парыжскай Камуны класіку ўсталяваны помнік. А побач з домам паэта, які, на жаль, не захаваўся да нашых дзён, 30 гадоў таму быў створаны Літаратурны музей Максіма Багдановіча.

Литературный музей в Минске

Адной з падзей, прымеркаваных да 120-годдзя беларускага класіка, стаў капітальны рамонт гэтага музея. Па словах яго супрацоўнікаў, праца зараз – у самым разгары. У хуткім часе тут усталююць новыя шыбы, заменяць фасад, у абноўленым музеі з'явіцца сістэма кандыцыянавання і вентыляцыі, створаць спецыяльны пад'ёмнік для інвалідаў. Рамонтныя работы плануецца скончыць у 2012 годзе.

Гродна

Праз восем месяцаў пасля нараджэння паэта бацька атрымаў новую працу ў Сялянскім пазямельным банку, і сям’я пераехала ў адзін з найстаражытных гарадоў Беларусі. Багдановічы пасяліліся на ўскраіне Гродна, дзе на лоне беларускай прыроды ў камфортнай абстаноўцы і прайшло ранняе дзяцінства Максіма.

Але ж ідылію парушыла хвароба маці будучага паэта. У чэрвені 1896 года ў яе выявілі сухоты. Праз чатыры месяцы Марыі Апанасаўны не стала.

З гродзенскім перыядам жыцця беларускага класіка можна пазнаёміцца ??ў музеі Максіма Багдановіча ў Гродне, што ўжо 25 гадоў існуе у тым доме, дзе жыла іх сям'я. Чатыры мемарыяльныя пакоі: кабінет бацькі, пакой маці, дзіцячая, гасцёўня, а таксама аддзел «Гарадзенская літаратурная: мінулае і сучаснасць» чакае сваіх гасцей.

Интерьер музея Богдановича в Гродно

Дырэктар музея Святлана Рапецкая расказвае, што тэматычныя мерапрыемствы, прысвечаныя 120-годдзю з дня нараджэння паэта, ладзіліся на працягу ўсяго года. «Мы праводзілі выставу дзіцячых малюнкаў, прысвечаных Багдановічу, конкурс дэкламантаў  творчасці класіка, выставу «Вянок паэту», літаратурна-музычную пастаноўку з удзелам гасцей з Мінска, канферэнцыю пры Гродзенскім універсітэце імя Янкі Купалы. Мерапрыемстваў было вельмі шмат».

На пачатку гэтага года Саветам Міністраў Беларусі было вырашана ўсталяваць у Гродне помнік Максіму Багдановічу. З'яўленне пастаменту запланавана на наступны год недалёка ад хаты паэта ў гарадскім парку імя Жылібера. Пакуль жа гарадскія ўлады абвясцілі конкурс на стварэнне бюста паэта. Вынікі будуць абвешчаны ў канцы снежня. З гэтай жа мэтай адкрыты спецыяльны дабрачынны рахунак, куды можна пералічыць грашовыя сродкі на будаўніцтва помніка.

Філіял 426 ААТ «АСБ Беларусбанк»

г. Гродна, вул. Ажэшкі, 4

р/р 3642502001062, код банка 152101199

УНП 590995342

Ніжні Ноўгарад

У гэтым горадзе прайшло дзесяць гадоў жыцця паэта. Пасля смерці жонкі, атрымаўшы пасаду ў Ніжагародскім сялянскім банку, бацька Адам Багдановіч з дзецьмі пераехаў туды ў лістападзе 1986 года. Тут Максім паступіў у губернскую гімназію. У 1906 годзе хросная маці Багдановіча выпісала для яго газеты «Наша доля» і «Наша ніва». У апошняй і быў надрукаваны яго першы літаратурны твор «Музыка».

У 1914 годзе пісьменнік у апошні раз наведаў горад свайго дзяцінства. У тым жа годзе ён напісаў апавяданне «Шаман», герой якога захапляецца Волгай і Ніжнім Ноўгарадам.

А 6 студзеня 1984 г. на будынку Ніжагародскай гімназіі (цяпер педагагічны ўніверсітэт) была ўстаноўлена мемарыяльная дошка М. Багдановічу. Імя паэта носіць таксама адна з вуліц горада.

Яраслаўль

У 1908 годзе бацьку Багдановіча пераводзяць на службу ў Яраслаўль. Тут прайшло восем гадоў жыцця паэта. Максім скончыў Яраслаўскую мужчынскую гімназію, дзе на яго светапогляд вельмі паўплывалі настаўнікі. Адзін з іх, беларус па нацыянальнасці, падтрымліваў цікавасць хлопчыка да нацыянальнай гісторыі і культуры. У гэты ж час у «Нашай ніве» былі апублікаваны і першыя вершы паэта «Прыйдзе вясна» і «Над магілай».

Затым Багдановіч наведвае Беларусь, дзе жыве напачатку ў Вільні, а потым у пасёлку Ракуцёўшчына. Пад уражаннем ад паездкі на радзіму ён піша славуты верш «Слуцкія ткачыхі».

У 1911 годзе па волі бацькі Максім Багдановіч паступае вучыцца ў Дзямідаўскі юрыдычны ліцэй. У студэнцкія годы займаецца вывучэннем славянскіх і еўрапейскіх моў і літаратур, але асабліва вялікую ўвагу надае роднай беларускай мове. Супрацоўнічае адначасова са шматлікімі газетамі і часопісамі, набываючы усе большую папулярнасць. Падчас жыцця ў Яраслаўлі выходзіць і першы прыжыццёвы зборнік яго паэзіі «Вянок» (1913), напісаны вершы «У вёсцы», «Вераніка» і многія іншыя.

Скончыўшы ліцэй у 1916 годзе, Максім Багдановіч нарэшце вяртаецца ў Мінск, аднак памяць аб ім назаўсёды застанецца і ў кутках Яраслаўля.

У траўні 1958 года на будынку гімназіі, дзе вучыўся паэт (цяпер Яраслаўскі тэхналагічны інстытут), была ўстаноўлена мемарыяльная дошка Максіму Багдановічу. А ў 1991 годзе ў ходзе рэалізацыі расійска-беларускага праекта ў горадзе з’явіўся і мемарыяльны дом-музей паэта.

Дом-музей поэта в Ярославле

Як паведаміла навуковы супрацоўнік музея Кацярына Міцкевіч, да 120-годдзя з дня нараджэння паэта ў Яраслаўлі праводзілася мноства розных мерапрыемстваў. «У лістападзе ў нас ладзіўся літаратурны вечар у гонар памяці паэта, а таксама конкурс чытальнікаў «Вянок паэзіі». Адна з удзельніц конкурсу, школьніца Анічка Назарэцян, перавяла верш Багдановіча «Зялёная каханне» на сваю родную армянскую мову. А ў кастрычніку капэла Яраслаўскага дзяржаўнага ўніверсітэта імя П.Г. Дзямідава правяла цыкл канцэртаў рамансаў, дзе гучалі вершы Багдановіча, упершыню пакладзеныя на музыку ўдзельнікамі канцэрту».

Ялта

Першы раз Максім Багдановіч прыехаў у Ялту ў 1909 годзе лячыцца ад сухотаў. Здавалася, лячэнне пайшло на карысць. Але праз 11 гадоў паэт вярнуўся сюды яшчэ раз і, па волі лёсу, застаўся ужо назаўсёды. 25 мая 1917 года ў Ялце, хворы на сухоты, Максім Багдановіч памёр.

Могила Максима Богдановича в Ялте

У месцы, дзе ён жыў, зараз знаходзіцца клуб санаторыя «Ялта». На адной са сцен устаноўлена памятная дошка беларускаму паэту.

Цікавасць да творчай асобы Максіма Багдановіча праяўляюць і ў Ялцінскім гісторыка-літаратурным музеі. Як паведаміла дырэктар мінскага Літаратурнага музея М. Багдановіча Таццяна Шаляговіч, на працягу гэтага года была аказана метадычная дапамога гісторыка-літаратурнаму музею ў Ялце. «Супрацоўнікам былі перададзеныя розныя электронныя дакументы: фотаздымкі Максіма Багдановіча, вокладкі розных выданняў паэта – матэрыял, якога не было ў калег, і які яны змогуць выкарыстаць для стварэння новай экспазіцыі. Акрамя таго, для правядзення літаратурнага вечара і прагляду залы Максіма Багдановіча, 1 снежня ў Ялту адправілася спецыяльная беларуская дэлегацыя. Супрацоўнікі гісторыка-літаратурнага музея ў сваю чаргу адправілі нам дакументы, якіх няма ў беларускай калекцыі. У асноўным гэта фотаздымкі хат, дзе жыў Багдановіч, яго бацькоў і сяброў».

 

Музеі паэта:

1. Літаратурны музей Максіма Багдановіча

Сайт: http://bagdanovich.museum.by/

Адрас: г. Мінск, вул. М. Багдановіча, 7а.

Тэлефон: 8 (017) 234-07-61

Працоўны час: з 10.00 да 17.00. Выхадны – панядзелак.

2. Філіял музея «Беларуская хатка»

Адрас: г. Мінск, вул. Рабкораўская, 19.

Тэлефон: 8 (017) 334-07-61

Працоўны час: з 10.00 да 17.00. Выхадны – панядзелак.

3. Філіял музея «Фальварак Ракуцёўшчына»

Адрас: Мінская вобл., Маладзечанскі р-н, в. Ракуцёўшчына.

Тэлефон: 8 (1773) 9-61-41

Працоўны час: з 10.00 да 17.00. Выхадны – панядзелак.

4. Музей Максіма Багдановіча ў Гродне

Сайт: http://bogdanovich.grodno.by/index.html

Адрас: г. Гродна, вул. 1-га Мая, 10

Тэлефон: 8 (0152) 72-22-54

Працоўны час: з 9.30 да 17.30. Выхадны - нядзеля, панядзелак.

5. Мемарыяльны дом-музей Максіма Багдановіча, Цэнтр беларускай культуры

Сайт: http://www.museum.ru/m3123

Адрас: г. Яраслаўль, вул.Чайкоўскага, 21

Тэлефон: 7 (4852) 32-93-54

Працоўны час: з 09.00 да 18.00. Выхадны – нядзеля.

6. Зала Максіма Багдановіча ў Ялцінскім гісторыка-літаратурным музеі

Адрас: г. Ялта, вул. Пушкінская, 5

Тэлефон: (0654) 32-30-65

Працоўны час: з 10.00 да 18.00. Выхадныя – панядзелак, аўторак.

Рубрики: Праздники

Страны: Беларусь


Комментарии отсутствуют

Новый комментарий

Имя:
:
Для редактирования комментария осталось 10 минут

Новости по теме:

Турнавигатор

Вся история белорусского турбизнеса в газете «Туризм и отдых»   |   Активный отдых   |   Калькулятор отдыха   |   Горные лыжи   |   Агротуризм   |   Путеводитель   |   Экзотические направления   |   Путешествия по Беларуси   |   Самые оригинальные бани на белорусских агроусадьбах