Экспазіцыя будзе складацца з фотафіксацый стрыт-арту, які існуе ў такіх геаграфічна аддаленых адзін ад аднаго культурных цэнтрах, як Варшава (Польшча) і Тбілісі (Грузія), паведамляе Галерэя сучаснага мастацтва «Ў».
«Шаблон – гэта інтэгральная галіна стрыт-арту. Адносна лёгкі ў выкананні, ён можа быць формай мастацкага выказвання кожнага чалакека, які мае што сказаць. І гэта не мусіць быць нівеліроўка ці наватарская праўда. Гэта ўмоўны знак, запіс, які не мае аўтара.
Безымянныя творцы з’яўляюцца сапраўднымі аўтарамі гэтай выставы.
Мы – Габрыэль Кайзэр і Віктар Кшыштапорскі – не з’яўляемся аўтарамі выстаўкі. Мы проста прэзентуем «знятыя»з муроў адбіткі шаблонаў. Мы аб’ядналіся на адлегласці і пачалі паляванне – Габрыэль у Варшаве, я ў Тбілісі. Мы хацелі паказаць, што шаблон на муры з’яўляецца творам абсалютна свабодным – без нацыянальнасці і межаў.
Мы свядома пазбягалі палітычную і гістарычную тэматыку ў імя ўніверсальнасці гэтага сродку выражэння.
Адлюстраваныя з дапамогай зрэпрадукаваных шаблонаў працы ў большасці маюць натуральны памер. У спалучэнні з фактурай сцен яны даюць паняцце пра арыгіналы. Яны з’яўляюцца нібы сувязным звяном - дадаткам да выдадзеных альбомаў і мноства фільмаў, даступных у інтэрнэце – насценным жывапісам невельмі вялікіх памераў.
Сціплае месца займаюць у іх таксама менш эфектныя шаблоны. Аднак іх усеагульнасць запэўнівае ім пачэснае месца ў гэтай форме свабоднай творчасці, умоўна званай СТРЫТ-АРТ».
Віктар Кшыштапорскі
Выстаўка працягнецца па 7 сакавіка 2014 г.