Аўтар кнігі – Аляксандр Суша, намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці, культуролаг, кнігазнавец, старшыня Міжнароднай асацыяцыі беларусістаў.

Прадстаўленыя выданні ўваходзяць у серыю «Беларуская дзіцячая энцыклапедыя» і прысвечаны ўсходнеславянскаму першадрукару Францыску Скарыне, які з’яўляецца, верагодна, самым яркім і вядомым творцам беларускай культуры. Гэта сапраўды чалавек-энцыклапедыя, чалавек-легенда. Яго талент праяўляўся літаральна ва ўсім: выдавец, перакладчык, пісьменнік, філосаф-гуманіст, тэолаг, вучоны, лекар, батанік, грамадскі дзеяч, прадпрымальнік…

Кніга выйшла ў трох тамах. Першы том, «Скарына – чалавек-энцыклапедыя», – пра шматграннасць першадрукара. Другая частка, «Францыск Скарына – чалавек свету», прысвечана падарожжам вялiкага палачанiна. Трэцяя, «Францыск Скарына – чалавек–легенда», распавядае пра спадчыну Скарыны. Тут ёсць раздзелы пра рукапiсную кнiгу, узнiкненне кнiгадрукавання, тэхналогii, якiмi карысталiся ў тую эпоху.

У 1517 годзе ў Празе выйшла першая друкаваная кніга Францыска Скарыны «Псалтыр», якая распачынае гісторыю беларускага і ўсходнеславянскага кнігадрукавання. З гэтай нагоды ў 2017 годзе Беларусь і ўвесь славянскі свет будуць адзначаць 500-годдзе знакавай падзеі. Міжнароднае прызнанне спадчыны Францыска Скарыны пацверджана рашэннем ЮНЕСКА аб уключэнні юбілея беларускага кнігадрукавання ў каляндар памятных дат міжнароднай арганізацыі.

Выданне ўпрыгожана вялікай колькасцю ілюстрацыйнага матэрыялу і прызначана для дзяцей сярэдняга і старэйшага школьнага ўзросту, а таксама ўсіх, хто цікавіцца багатай гісторыяй нашай краіны.

Дзе: пр-т Незалежнасці, 116, 3-і паверх