Наведвальнікі фестывалю «Басовішча» з Мінска атрымалі візавую падтрымку – урэшце спробы дамовіцца з польскім пасольствам прынеслі станоўчы вынік.
Уся неабходная інфармацыя ёсць на старонцы «Басовішча».
Раней групавыя візы ў Польшчу на фестываль пачалі афармляць у польскіх консульствах, прыгадвае старшыня Беларускага аб’яднання студэнтаў, аднаго з арганізатараў фестывалю, Ганна Пякарская:
– З візамі, я думаю, усе тыя, хто сочыць, ведаюць, што ў Гродне мы ўжо атрымалі і завяршылі набор заявак. У Брэсце яшчэ, думаю, можна даслаць заяўкі, калі будзеце патрабаваць нейкія запрашэнні ці штосьці яшчэ, то мы без праблем вам гэта напішам.
Толькі што атрымалі цудоўную інфармацыю і адразу вам яе пераказваем. Усе, хто хоча атрымаць візавую падтрымку з пасольства ў Мінску, дасылайце заяўкі на адрас: vizy@basowiszcza.org, ужо дзейнічае! Да імэйла далучыце такую інфармацыю:
1) імя і прозвішча,
2) дата нараджэння,
3) адрас,
4) кантактны нумар,
5) нумар пашпарту,
6) дата выдання і прыдатнасці пашпарту.
ЗАЯЎКІ ПРЫМАЕМ ТОЛЬКІ ДА 21.06, 21.00»
Сярод хэдлайнераў «Басовішча-2015» Лявон Вольскі, Brutto, таксама ўжо вядома пра ўдзел гурта Akute. У праграме таксама ёсць Dzieciuki з Гродна і Yegor Zabelov Trio з Мінска, польскія гурты Lao Che і Ostrov.
Фестываль музыкі маладой Беларусі «Басовішча» ў 2015 годзе традыцыйна будзе праходзіць на лясной паляне ў Борыку каля мястэчка Гарадок непадалёк ад беларуска-польскай мяжы ў самай сярэдзіне лета – 17-18 ліпеня.
Фэст «Басовішча» бясплатны. Цягам некалькіх апошніх гадоў у арганізатараў паўставалі складанасці з дамовай на візавую падтрымку, у тым ліку па той прычыне, што наведвальнікі фэсту не маюць квіткоў і праз гэта пасольства аніякім чынам не можа спраўдзіць намеры таго, хто звяртаецца па візу.
«Басовішча» ладзяць у сярэдзіне лета ўжо трэцяе дзесяцігоддзе. Без залішняй сціпласці фэст можа называць сябе культавым. Асаблівую ўнікальную атмасферу на лясной паляне каля мястэчка Гарадок фармуюць з пакалення ў пакаленне ўсё новыя арганізатары фэсту з Беларускага аб’яднання студэнтаў у Польшчы.