Сёння, у часы інтэрнэту і э-мэйлаў традыцыйная паштоўка губляе сваю былую папулярнасць. Гісторыя адкрытага паштовага аркуша, які папярэднічаў з’яўленню паштоўкі, пачынаецца прыблізна з апошняй чвэрці ХІХ стагоддзя, калі новая форма карэспандэнцыі надзвычай хутка распаўсюджваецца ў Еўропе і свеце. Багаты і разнастайны матэрыял, які перадусім увасобіў друкарскую і дызайнерскую працу, з’яўляецца прываблівым для шматлікіх калекцыянераў – філакартыстаў. Паштоўка ўвасабляе сабой значны пласт развіцця мастацкай культуры, перадусім - графікі і фотамастацтва. Сёння паштоўка з’яўляецца важным элементам іміджавай рэпрэзентацыі пэўнай суполкі, групы, прадпрыемства, калі замаўляецца да сезонных віншаванняў, круглых дат.
Усё ж паштоўка найчасцей утрымлівае рысы асабістага, інтымнага паслання, што робіць яе надзвычай каштоўнай для чалавека, якому яна накіроўваецца. Замяніць электронным аналагам почырк, дотыкавую адчувальнасць паштоўкі, дастаўку традыцыйнай поштай а таксама ўяўную матэрыялізаваную памяць аб адпраўшчыку сучасныя інфармацыйныя тэхналогіі пакуль а можа і ўвогуле не будуць у стане, таму чалавек са стратай традыцыі дасылаць паштоўкі, незаўважна губляе пэўную часціну самога сябе, свайго індывідуалізму.
Першы беларускі фестываль аўтарскай паштоўкі мае на мэце спрыяць адраджэнню гэтага жанру. У экспазіцыі рэпрэзентаваныя як і разнастайныя гістарычныя ўзоры паштовак, пачынаючы з пачатку ХХ стагоддзя, так і працы вядомых беларускіх аўтараў. Асобнай часткай праекту з’яўляюцца конкурсныя працы, адмыслова распрацаваныя беларускімі дызайнерамі і мастакамі, студэнтамі ВНУ. 
У межах фестывалю адбудуцца майстар-класы этагамі, каліграфіі, самаробнай паштоўкі, пройдуць тэматычныя вечарыны.