Як паведамляе Radzima.org:

Палацавы комплекс Святаполк-Чацвярцінскіх у Жалудку – адзін з найлепшых узораў сядзібнай архітэктуры ў Беларусі. На жаль, нягледзячы на неаднаразовыя спробы рэнавацыі, комплекс знаходзіцца ў занядбаным стане і паволі руйнуецца.

У верасні 2011 г. палацава-паркавы комплекс набывае іншую форму існавання – маляўнічы твор, які адлюстроўвае не толькі графічныя характарыстыкі свайго прататыпу, але перадае змест і глыбіню усіх этапаў існавання помніка архітэктуры. Група выпускнікоў акадэміі мастацтаў два дні працавала над стварэннем жывапісных твораў. Мастакі здолелі за гэты кароткі стварыць якасны паэтычны цыкл мастацкіх эскізаў. Адметная асаблівасць цыклу – імпрэсіяністычнасць мастацкага вырашэння і аптымістычнасць вобразнага зместу. У гурт мастакоў уваходзілі: Наталля Табушава, Аляксей Навумчык, Наталля Белавусава, Марына Барысенкава, Дар’я Шышкова.

24 студзеня 2012 г. а 18.00 у выставачнай зале музея гісторыі беларускага кіно ў Мінску па вул. Свярдлова, 4 адкрылася выстава «ДУХ Гісторыі», дзе прадстаўлены работы мастакоў, якія адлюстравалі на сваіх палотнах гэты выдатны архітэктурны комплекс.