Як паведамляе Радыё Рацыя:
У суботу, 21 красавіка, Беларускае дабраахвотнае таварыства аховы помнікаў гісторыі і культуры ладзіць талаку ў Зембіне па добраўпарадкаванню руін былога дамініканскага касцёла.
Распавядае кіраўнік таварыства Антон Астаповіч:
– Гэта валанцёрская работа па добраўпарадкаванню руін касцёла і тэрыторыі могілак, на якіх стаіць касцёл, сіламі валанцёраў, менавіта сяброў таварыства, гэта ў асноўным людзі, якія ўваходзяць у кіруючыя органы дабраахвотнага таварыства аховы помнікаў гісторыі і культуры.
Летась грамадскасць Барысаўскага раёна і Беларускае дабраахвотнае таварыства аховы помнікаў гісторыі і культуры адстаялі зембінскі касцёл Унебаўзяцця Найсвяцейшай Панны Марыі, які мясцовыя чыноўнікі хацелі пазбавіць статуса помніка. Над рэшткамі касцёла ўзята шэфства, адным з такіх шэфскіх мерапрыемстваў і з’яўляецца суботняя талака.
У Зембіне для ўдзельнікаў талакі будзе арганізаваны канцэртны выступ вядомага барда Зміцера Бартосіка.
Васіль Кроква