высвятляла, куды беларусы едуць на Новы год.
«Гэты Новы год, спадзяюся, буду адзначаць у сталіцы Швецыі Стакгольме. Бо ўсе іншыя гады адзначала ў Мінску ці іншых гарадах Беларусі з сябрамі альбо з бацькамі. Усё звыкла, добра, традыцыі, але захацелася нейкай змены», — дзеліцца з «Еўрарадыё» сваімі планамі мінчанка Юлія.Мы вырашылі даведацца, якія яшчэ краіны прывабліваюць беларускіх турыстаў у навагоднюю ноч.
«Вельмі карысталася папулярнасцю калядная і навагодняя Чэхія. Экскурсійны тур вельмі добра прадаваўся, і ў пачатку снежня амаль усё было прададзена. Папулярная сустрэча Новага года ў Егіпце. Прадавалася Турцыя, Львоў. Гэта самыя папулярныя кірункі», — распавядаюць у турыстычнай кампаніі «АлатанТур».
У турфірме «Росбелтурызм» адзначаюць жаданне беларусаў сустрэць Новы год у «бліжэйшым замежжы»: Кракаве альбо Будапешце. Кошты тураў на 3-4 дні пачынаюцца са 110 еўра.
Паводле слоў намесніцы дырэктара «Росбелтурызма» Наталлі Таберка, усё больш і больш беларусаў аддаюць перавагу святкаванню Новага года за мяжой.
Наталля Таберка: «Раней навагоднія туры не карысталіся такой цікавасцю. На рынку з’явілася шмат праграм-тураў менавіта навагодніх. Гэта не пакінула абыякавымі турыстаў. Думаю, што на 30 адсоткаў попыт на гэтыя туры вырас, калі параўноўваць з мінулым годам».
Традыцыйна шмат беларусаў праводзяць Каляды і Новы год у суседняй Вільні. Віленскі інфармацыйна-турысцкі цэнтр падчас святаў летась налічыў 255 чалавек з Беларусі (менавіта тых, хто звярнуўся сюды па даведку). У гэтым годзе чакаюць значна больш, кажа супрацоўніца цэнтра Зіта Букена.
Зіта Букена: «Ужо атрымалі шмат пытанняў і па электроннай пошце, і тэлефанаванняў, як сустрэць Новы год, якія экскурсіі замаўляюць у цэнтры».
Але разам з тым «Еўрарадыё» знайшло і некалькі нетрадыцыйных варыянтаў сустрэчы Новага года. Так, турыстычная кампанія «Солвекс» прапануе так званыя шуб-туры, якія ў тым ліку выпадаюць і ў ноч з 31 снежня на 1 студзеня.
«Чалавек плаціць 1 еўра, яму бясплатна адкрываюць візу — і тур, і пражыванне ў гатэлі бясплатныя. Іх возяць па фабрыках, і яны мусяць набыць футра на кошт 1200 еўра. Іх спансуюць вось гэтыя фабрыкі. І ёсць заезд 30-га на Новы год і сустрэча Новага года ў Салоніках у 5-зоркавых гатэлях», — распавядае супрацоўніца кампаніі Ганна.
А яшчэ адна турфірма, «Долсан», некалькі месяцаў таму прапанавала за 150 тысяч рублёў сустрэць Новы год з чупакабрай.
Але, нягледзячы на невялікую цану, вялікага ажыятажу прапанова не выклікала.
Турфірма «Долсан»: «Не карысталася асабліва папулярнасцю. Але некаторыя людзі, канешне ж, знайшліся, якія зацікавіліся».
Зміцер Кустоўскі