З беларускім акцэнтам прайшоў у Маямі ў ЗША роварны рэйд з нагоды Хэлоўін. Беларускія ўдзельнікі прабегу ехалі з бел-чырвона-белымі сцягамі ды музыкай.

Беларуская грамада далучылася да крытычнай масы, якую кожную пятніцу месяца ладзяць амерыканцы, кажа карэспандэнтка Беларускага Радыё Рацыя з ЗША Паліна Прысмакова:

– Трэба было прыцягнуць увагу. А ідэя палягала на тым, каб у час рэйду са сцягамі і пад беларускую музыку (мы былі з магнітафонамі) як мага больш распаўсюдзіць інфармацыі. Людзі пыталіся: «А што гэта за сцягі, чыя гэта музыка?» Вядома, што большасць людзей у Маямі з Лацінскай Амерыкі, для якіх Беларусь – дзівосная краіна, таму ім цікава, што гэта за краіна і дзе яна знаходзіцца. Шмат людзей спынялася каля нас.

Акцыяй амерыканскія беларусы выказалі таксама салідарнасць з пакаранымі за ўдзел у роварным прабегу стылягаў, які адбыўся ў Мінску ў жніўні.