У мінулую суботу ў Вязынцы адбыўся фінальны канцэрт конкурсу аўтарскай песні “Купалаўскія вакацыі”.
Яго заснавальнікамі і арганізатарамі былі Міністэрства культуры Рэспублікі Беларусь, Дзяржаўны літаратурны музей Янкі Купалы, Маладзечанскі раённы выканаўчы камітэт, Цэнтральны камітэт Беларускага прафсаюзу работнікаў культуры, а таксама газеты “Советская Белоруссия”, “Туризм и отдых”, турыстычная кампанія Pegas Touristik, народны літаратурны тэатр “Жывое слова” БДПУ імя М.Танка, ТДА “Экстрым ТВ”.

Атмасфера падзеі была вельмі сяброўская, утульная – быццам бы разам сабраліся добрыя сябры. А менавіта так і было.

Нават летні шпаркі дождж не змог унесці дысананс ва ўсеагульнае свята.

Ані рыбакоў, ані ўдзячных слухачоў дажджом не напалохаеш...

Падчас фінальнага канцэрта ў Вязынцы былі падведзены вынікі і абвешчаны пераможцы ў наступных намінацыях:

прыз і дыплом за лепшае выкананне песні на словы Янкі Купалы атрымаў Арцём Сітнікаў;

у намінацыі "Лепшая аўтарская песня" перамог Сяргей Башлыкевіч, які атрымаў і прыз глядацкіх сімпатый;

за лепшае спалучэнне тэксту і музыкі адзначаны Міхась Бараноўскі і гурт “Нельга забыць”;

з лепшай прэзентацыяй песні выступіла Ханна Чумакова;

спецыяльным прызам “Надзея” быў узнагароджаны гурт “Пацукі”;

спецыяльныя прызы ад кампаніі “Будзьма” і турыстычнага агенцтва Pegas Touristik атрымаў Аляксей Нежавец.

У Вязынцы прайшло і адкрыццё фотавыставы былога намесніка амбасадара ЗША ў Беларусі, фотамастака Джона Кунстадтэра, які, дарэчы, з’яўляецца патрыётам Беларусі і добра размаўляе па-беларуску. Атмасфера беларускасці літаральна лунала над святам!

Вядучая Кацярына Ваданосава, супрацоўніца музея і салістка гурта Alta Mente, разам з маленькай Стэфкай былі самымі яскравымі і найлепшымі “фотамадэлямі”. Згадзіцеся, як не захапіцца такімі хараством і гармоніяй!