Як паведамляе «Твой стыль»:
Арганізатары гонкі палічылі сімвалічным завяршыць сезон у тым месцы, дзе ён пачынаўся.
Сярод заяўленых да ўдзелу веласіпедыстаў былі вылучаны дзве катэгорыі: «эліта» і «кандыдаты».
«Эліта» – амаль што прафесійныя велагоншчыкі, якія не першы раз прымаюць ўдзел ў такіх гонках. «Кандыдатамі» былі веласіпедысты-аматары ці навічкі.
Ад катэгорыі залежала і працягласць трасы – 3 ці 5 кругоў, кожны з якіх – прыкладна тры кіламетры.
Як адзначылі арганізатары, у апошняй гонцы сезону было значна менш удзельнікаў, чым у папярэдніх.Не было на гэты раз і дзяўчын-веласіпедыстак. Але, што цікава, у катэгорыі «кандыдатаў» браў удзел грамадзянін Балгарыі, які гасцюе ў Гародні.
Ён даведаўся аб гонцы праз гродзенскі форум і вырашыў паспрабаваць свае сілы.
Нягледзячы на невялікую колькасць ўдзельнікаў, фінал атрымаўся вельмі напружаным і інтрыгуючым.
Барацьба была не толькі за перамогу ў фінале, але і за першынство ў фінальным заліку.
Пераможцаў атрымалася шмат: 6 – у фінальнай гонцы і 6 пераможцаў сезону (па тры ў кожнай катэгорыі).
Усе былі ўзнагароджаны кубкамі і прызамі ад арганізатараў і спонсараў.
Фіналісты сезону катэгорыі «эліта» адзначылі перамогу фантанам шампанскага.
Наступны сезон гонак арганізатары плануюць пачаць у траўні. Яны абяцаюць больш насычаныя гонкі з ўдзелам прафесійных веласіпедыстаў, а таксама ўсіх жадаючых.Ганка Марза, фота аўтара