Выкладчык Пінскай вышэйшай духоўнай семінарыі ксёндз Эдуард Мігай падчас правядзення набажэнства ў гомельскім касцёле
- Чакаў убачыць там казку ў беларускіх традыцыях, але, як апынулася, амаль нічога нацыянальнага ў гэтай сядзібе няма. Казку ператварылі ў чыстыя забабоны. Да прыкладу, паставілі скульптуры 12 месяцаў і кажуць, што трэба за іх патрымацца і загадаць жаданне. Але ж гэта звычайнае пакланенне драўляным ідалам.
Потым мы пачынаем думаць аб тым, што і Бог - гэта ўсяго толькі інструмент выканання жаданняў. А калі наша жаданне не выконваецца, кажам, што Бога няма. Або млын, які нібыта перамолвае грахі. Мы доўга рыхтуем дзяцей да сакрамэнту споведзі, а яны прыязджаюць да Дзеда Мароза, і ім кажуць: нічога рабіць не трэба, проста дакраніцеся да млына. Людзі ідуць і дакранаюцца. Добра, што ў іх ёсць жаданне пазбавіцца ад грахоў. Але праблема ў тым, што яны дакранаюцца да млына, а грахі застаюцца!
Калі пачынаем верыць ва ўсё гэта, прымаем забабоны, яны пачынаюць дзейнічаць у нашым жыцці. Узнікае апантанасць, уваходзім у гэты праклён, аддаляемся ад Бога, ад сакрамэнтаў. А значыць, слабее нашае духоўнае жыццё, перастаем быць з Божай ласкай, становімся безабароннымі перад злымі сіламі і ўпадаем у страшныя грахі. Не варта забываць, што як у Бога ёсць план па выратаванні чалавека, так ёсць і план дэмана, каб чалавека знішчыць.
Таму не раю адпраўляць дзяцей на экскурсію ў сядзібу Дзеда Мароза разам з класам або іншымі групамі. Можна бацькам паехаць разам з дзецьмі, каб ім усё правільна растлумачыць, абараніць ад падману.
Так, дзеці жадаюць верыць у Дзеда Мароза, але потым прыходзіць момант, калі яны разумеюць, што гэта няпраўда, і ў дзяцей узнікае пустэча. У што тады верыць? Яны адчуваюць сябе падманутымі, надыходзіць расчараванне. Таму лепш расказаць дзецям пра святога Мікалая. Пра тое, што быў такі чалавек, біскуп, які дапамагаў людзям, дарыў ім падарункі. Дзеці ў сваім узросце ўжо бываюць па-свойму дарослымі, таму можна гаварыць з імі як з дарослымі.