Кангрэсы беларусістаў праводзяцца з 1991 года грамадскім аб’яднаннем «Міжнародная асацыяцыя беларусістаў», заснавальнікамі якога з’яўляюцца Міністэрства культуры Рэспублікі Беларусь, Міністэрства адукацыі Рэспублікі Беларусь, Міністэрства замежных спраў Рэспублікі Беларусь і Нацыянальная акадэмія навук Беларусі. Правядзенне кангрэсаў заклікана садзейнічаць развіццю беларусістычных даследаванняў у галіне гуманітарных і сацыяльных навук, спрыяць выкладанню беларусазнаўчых дысцыплін за межамі Беларусі і палягчаць міжнароднае супрацоўніцтва паміж даследчыкамі ў свеце.
VІ Міжнародны кангрэс беларусістаў плануецца правесці ў якасці аднаго з мерапрыемстваў, прымеркаваных да 500-годдзя беларускага і ўсходнеславянскага друку. Таму пад час кангрэса будзе працаваць круглы стол з назвай «Францыск Скарына і яго час», які адлюструе праблематыку вывучэння беларускага кнігадрукавання ў XVI–XVII стст.
Пасяджэнні кангрэса будуць праходзіць у фармаце тэматычных блокаў і закрануць разнастайныя беларусістычныя і славістычныя праблемы ў галіне мовазнаўства, літаратуразнаўства, гісторыі і філасофіі.
Асобны блок прысвечаны вывучэнню беларускай мовы як замежнай і мае на мэце скаардынаваць намаганні лінгвістаў па навучанню іншаземцаў беларускай мове.
Плануецца, што на кангрэсе, акрамя навукоўцаў з Беларусі, выступяць вучоныя з Аўстрыі, Венгрыі, Вялікабрытаніі, Германіі, Канады, Літвы, Польшчы, Расіі, Украіны, Японіі.
Арганізатарам мерапрыемства з’яўляецца грамадскае аб’яднанне «Міжнародная асацыяцыя беларусістаў».