У Магілёве адкрыліся курсы беларускамоўных экскурсаводаў

02.09.2015 - Новости

У Магілёве адкрыліся курсы беларускамоўных экскурсаводаў

У арганізацыі спадзяюцца, што праз гэтыя курсы ў горадзе стане больш беларускамоўных гідаў. Пакуль жа, як зазначае кіраўнік суполкі ТБМ Алег Дзьячкоў, у Магілёве толькі адзін атэставаны экскурсавод, які ладзіць вандроўкі па горадзе, апавядаючы пра яго на мове беларусаў, — гэта ён сам.

З ініцыятывай праводзіць курсы экскурсаводаў выступілі сябры суполкі і вучні старэйшых клясаў з мясцовых школ. Яны ўдзельнічалі ў некалькіх вандроўках з беларускамоўным гідам па горадзе і самі загарэліся жаданнем стаць экскурсаводамі.

«Мая асабістая мара – падрыхтаваць яшчэ хоць аднаго беларускамоўнага экскурсавода. Што да моладзі, дык калі з іх не выйдзе экскурсаводаў, дык яны хоць больш даведаюцца пра Магілёў», — кажа Алег Дзьячкоў.

«Тутэйшыя экскурсіі праводзяцца маімі калегамі толькі на рускай мове, — зазначае ён. — Беларускамоўныя экскурсіі не запатрабаваныя. Калі няма замоў на беларускамоўныя экскурсіі, то іх і няма наогул».

Алег Дзьячкоў заўважае: каб праводзіць экскурсіі на беларускай мове, недастаткова ёю валодаць. Трэба яшчэ ствараць вакол сябе асяроддзе тых, хто цікавіцца гісторыяй і хоча, каб пра яе апавядалі па-беларуску.

«Я імкнуся ствараць такія групы. За восем гадоў у мяне ёсць свая кліентура, якая замаўляе экскурсіі на беларускай мове. Напрыклад, ёсць група байкераў, якія хочуць чуць аповеды пра гарады на беларускай мове. Я ім два гады таму правёў беларускамоўную экскурсію, і цяпер яны замаўляюць яе рэгулярна».

«Галоўнае ў працы экскурсавода — гэта любоў да Радзімы і ўменне перадаць яе іншым людзям», — выказваецца адна з наведвальніц курсаў экскурсаводаў.

«Я ўжо на пенсіі і гісторыю вывучала яшчэ ў савецкія часы. Нядаўна на курсах даведалася, што Беларусь не была пад прыгнётам мангола-татараў. Гэта было для мяне адкрыццём», — прызнаецца суразмоўніца і дадае:

«Мы ўсе ведаем, напрыклад, пра французскіх мушкецёраў, а я нядаўна гасцявала ў Дзятлава, а там жа Канстанцін Астрожскі ўзвёў замак ды царкву. Пра яго ў Дзятлаве мала хто ведае. А ён жа таксама быў рыцарам. Мы больш ведаем пра расійскіх цароў, чым пра сваіх князёў».

Яшчэ адна наведвальніца курсаў прызнаецца: яе мара — расказаць беларусам пра багатую гісторыю іхняй краіны.

«Я вывучала савецкую гісторыю, у якой мала месца адводзілася гісторыі Беларусі. Беларусам навязвалася ў савецкі час гісторыя імперскай Расіі. Таму мне хочацца паболей ведаць пра гісторыю Беларусі і расказваць іншым пра яе. На жаль, людзі сталага веку дагэтуль не ведаюць гісторыі нашай краіны, і гэта дужа прыкра», — зазначае экскурсавод-пачаткоўка.

Курсы экскурсаводаў суполка ТБМ ладзіць раз на тыдзень на магілёўскім замчышчы. Пасля месячнага перапынку на адноўленыя заняткі прыйшлі трое ахвотніц стаць гідамі. Жанчыны сталага веку апавядалі пра магілёўскі замак і тых, хто яго наведваў.
Nn.by

Рубрики: Экскурсоводам

Страны: Беларусь


Комментарии

Аватар

02.09.2015 14:30
Андрэй
ответить

Цікава, спадар Алег ведае, што нельга вадзіць экскурсіі па Магілеве пасля такіх курсаў. Гэта парушэнне заканадаўства. Толькі НАТ мае права выдаваць пасведчанне экскурсавода пасля адпаведнай атэстацыі?

Новый комментарий

Имя:
:
Для редактирования комментария осталось 10 минут

Новости по теме:

Турнавигатор

Вся история белорусского турбизнеса в газете «Туризм и отдых»   |   Активный отдых   |   Калькулятор отдыха   |   Горные лыжи   |   Агротуризм   |   Путеводитель   |   Экзотические направления   |   Путешествия по Беларуси   |   Самые оригинальные бани на белорусских агроусадьбах