Як паведамляе Радыё Рацыя:
У сталічнай Арт-сядзібе сёння цэлы дзень будуць размаўляць пра падарожжы, межы і візы. Тут пачаўся фестываль мабільнасці «Самаход».
Ініцыятарамі фестывалю выступіла грамадская кампанія «Без візы», распавядае кіраўнік сядзібы па мерапрыемствах Павел Белавус:
– Цэлы дзень у нас будзе праходзіць фестываль мабільнасці «Самаход». Ёсць такая грамадская кампанія «Без візы», якая знаходзіцца ў Літве, у якой збольшага заангажаваныя беларусы, якія жывуць ці вучацца ў Вільні і наогул у Літве. Яны ініцыявалі і стварылі такую кампанію, якая ўзнімае праблему візавых узаемаадносін. Галоўная іх мэта – каб візы ўвогуле зніклі, і іх не было. Яны прапанавалі, і мы вырашылі сумесна правесці такі фестываль.
У межах фестывалю будуць адбывацца размовы і паказ фільмаў пра людскую мабільнасць. Ініцыятары мерапрыемства лічаць, што ў людзей не павінна быць межаў і яны маюць права вандраваць, шукаць прыгод у розных краінах і па ўсім свеце.
Васіль Кроква
